बोरगाव प्रतिनिधी
सुरगाणा तालुक्यात गेल्या काही दिवसांपासून पडत असलेल्या अवकाळी पावसामुळे शेतकऱ्यांचे मोठ्या प्रमाणावर नुकसान झाले आहे. नुकत्याच कापणीस आलेल्या भाताच्या पिकावर या अवकाळी पावसाचा जोरदार फटका बसला आहे. शेतकऱ्यांची वर्षभराची मेहनत आणि खर्च या पावसामुळे पाण्यात गेला आहे. अनेक शेतकऱ्यांनी आपल्या शेतातील भात कापून वाळवण्यासाठी ठेवला असताना अचानक आलेल्या पावसामुळे सर्व भात ओला झाला. त्यामुळे भात कुजण्याची शक्यता निर्माण झाली आहे. काही ठिकाणी तर भाताचे गाठी पूर्णपणे पाण्यात बुडाल्या आहेत. या अवकाळी पावसामुळे बोरगाव घाटमाथा परिसरातील घोडाबे, हतगड, पोहाळी, साजोळे, सराड, घागबारी, मोहपाडा, हरणटेकडी तसेच झगडपाडा, आंबोडे, खोकरविहीर, केळावण, खडकी,आणि परिसरातील इतर गावांतील शेतकरी मोठ्या अडचणीत सापडले आहेत. या भागातील तला महाले, प्रकाश घांगळे, अशोक महाले, शांताराम भोये, चिंतामण घांगळे, हिरामण भोये, देवराम राऊत, वसंत घांगळे तसेच इतर अनेक शेतकऱ्यांचे मोठे नुकसान झाले आहे. काहींनी तर वर्षभराचा सारा खर्च याच भाताच्या पिकावर केला होता. शेतकऱ्यांनी सरकारकडे मागणी केली आहे की, प्रशासनाने तातडीने या भागात पाहणी करून पंचनामे करून नुकसानग्रस्त शेतकऱ्यांना योग्य ती आर्थिक मदत द्यावी. हा त्यांचा वर्षभराचा घामाचा मोबदला आहे, जो आता निसर्गाच्या कोपामुळे हातातून जात आहे. स्थानिक शेतकऱ्यांचे म्हणणे आहे की, पुढील दोन ते तीन दिवस पावसाचा अंदाज वर्तवला गेला आहे. त्यामुळे प्रशासनाने विलंब न करता शेतांमध्ये जाऊन त्वरित पंचनामे करावेत. शेतकऱ्यांनी अशीही मागणी केली आहे की, शासनाने विशेष निधी उपलब्ध करून देत भात पीकविमा योजनेअंतर्गत नुकसानभरपाई लवकरात लवकर वितरित करावी, जेणेकरून शेतकऱ्यांना पुढील हंगामासाठी थोडा आधार मिळेल. सध्या झगडपाडा परिसरातील शेतांमध्ये पाणी साचलेले असून काही ठिकाणी भात पूर्णपणे चिखलात गेला आहे. अनेक शेतकऱ्यांचे धान्य वाचविण्यासाठी प्रयत्न सुरू आहेत, मात्र पावसाने दिलेला तडाखा गंभीर आहे. अवकाळी पावसामुळे निर्माण झालेल्या या संकटाकडे सरकारने दुर्लक्ष न करता, शेतकऱ्यांच्या बाजूने उभे राहणे हीच सध्याची खरी गरज आहे.
