एसएनएफ ,ॲस्ट्रल फाऊंडेशन व ग्रामपंचायतीचे लाभले सहकार्य

पेठ प्रतिनिधी

सोशल नेटवर्किंग फोरम (SNF) आणि ॲस्ट्रल फाऊंडेशन यांच्या संयुक्त विद्यमाने पेठ तालुक्यातील आडगाव भुवन येथे नव्याने उभारण्यात आलेल्या वाचनालयाचे दिमाखदार उद्घाटन नुकतेच संपन्न झाले. प्रारंभी गावातून टाळ मृदुंगाच्या गजरात ग्रंथदिंडी काढण्यात आली.या वाचनालयाच्या उभारणीमुळे ग्रामस्थ, स्पर्धा परीक्षेची तयारी करणारे विद्यार्थी तसेच लहान मुलांमध्ये वाचन संस्कृती रुजण्यास मोठी मदत होणार आहे. उद्घटनाला प्रमुख पाहुणे म्हणून निवृत्त महापालिका आयुक्त जीवन सोनवणे, एसएनएफचे संस्थापक प्रमोद गायकवाड, तालुका समन्वयक रामदास शिंदे, विजय भरसट, सरपंच रेखा गावित, सामाजिक कार्यकर्ते नेताजी गावित , राहुल गाडगीळ. संदीप डगळे यांचे उपस्थितीत संपन्न झाले. मागील वर्षी एसएनएफच्या माध्यमातून ॲस्ट्रल फाऊंडेशनच्या सहकार्याने आडगाव भुवन गावातील पाणीप्रश्न मार्गी लावण्यात आला होता. त्या योजनेच्या लोकार्पणावेळी गावातील तरुणांनी गावात वाचनालयाची गरज व्यक्त केली होती. त्यावर उपस्थित ॲस्ट्रल फाऊंडेशनचे श्री. अनिकेत धुरी यांनी तत्काळ सकारात्मक प्रतिसाद देत “मी वरीष्ठांशी बोलून कळवतो” असे सांगितले होते. अहमदाबाद येथे परतल्यानंतर त्यांनी सिएसआर विभागाशी चर्चा करून वाचनालयासाठी निधी मंजूर केला. त्या निधीतून उभारण्यात आलेल्या वाचनालयाचे उद्घाटन ग्रामस्थांच्या उपस्थितीत मोठ्या उत्साहात झाले. हे सोशल नेटवर्किंग फोरमच्या माध्यमातून उभारण्यात आलेले २९ वे वाचनालय आहे. त्यापैकी ॲस्ट्रल फाऊंडेशनच्या सहकार्याने एकूण तीन वाचनालयांची उभारणी करण्यात आली आहे. यावेळी रेखा नेताजी गावित सामाजिक कार्यकर्ते नेताजी गावित सदस्य देविदास जाधव ,रामा जाधव, दिनकर खुरकुटे,हरि खुरकुटे ,यशवंत गायकवाड, तुकाराम वाघमारे, दिगंबर भुसारे,संजू गोंड, दिपक भुसारे,हणुमंत खुरकुटे यांचे सह ग्रामस्थ विद्यार्थी मोठ्या संख्येने उपस्थित होते. सोशल नेटवर्किंग फोरमचे प्रमुख प्रमोद गायकवाड यांनी सांगितले की, “आदिवासी व ग्रामीण भागात ज्ञानाची ज्योत तेवत ठेवणे हे आमचे ध्येय आहे. देणगीदार आणि सहकाऱ्यांच्या पाठबळावर ही चळवळ आता जनतेची झाली आहे.”एसएनएफच्या माध्यमातून उभी करण्यात आलेली ही वाचनालये आज ग्रामीण भागातील शिक्षण केंद्रे म्हणून कार्यरत आहेत. “ज्योतसे ज्योत जोडत जाऊन एसएनएफ ज्ञानाचे दीप प्रज्वलित करत आहे,” असे जीवन सोनवणे यांनी सांगितले. या वाचनालय उभारणीसाठी पेठ तालुका समन्वयक रामदास शिंदे सर, ग्रामसमन्वयक नेताजी गावीत, संदिप डगळे, आडगावचे ग्रामस्थ यांनी महत्त्वपूर्ण परिश्रम घेतले. ग्रामपंचायतने वाचनालयासाठी जागा उपलब्ध करून देऊन महत्वाची भूमिका निभावली.